Rev 14 | APZ | STEP | Ngko nohumanji ole uhwonɨmentoho, oso Hwe nakwoe Wonyo'ne Poyo Pe'nɨmentiso sohwo kako hwofɨki'nyo Saiyon sopo nohumentanɨngki a'amu wan hantɨlet fouti-foua tausen ɨso (144,000) kako'nji humentanɨngkofi uhwonɨmentohefoho. Oso a'amu hofo sofe yomohu'nyopo a'amu nakwoe wonyo'ne poyo pe'nɨmentiso sohwoe yofe'nji kanɨngkwohwoe yofe'nji wentanɨngki uhwonɨmentohefoho.

Revelation of John 14

A'amu ‘wan hantɨlet fouti-foua tausen’ ɨso (144,000) hofɨkoe ta songo lɨmentohofofoho.

1 Ngko nohumanji ole uhwonɨmentoho, oso Hwe nakwoe Wonyo'ne Poyo Pe'nɨmentiso sohwo kako hwofɨki'nyo Saiyon sopo nohumentanɨngki a'amuwan hantɨlet fouti-foua tausenɨso (144,000) kako'nji humentanɨngkofi uhwonɨmentohefoho. Oso a'amu hofo sofe yomohu'nyopo a'amu nakwoe wonyo'ne poyo pe'nɨmentiso sohwoe yofe'nji kanɨngkwohwoe yofe'nji wentanɨngki uhwonɨmentohefoho. 2 Ose uhwononji mampaho ahwomo mta'ni upa'nɨmentohefoho. Mampaho hiso mijifatɨkusi'yoka ahwomo yoka mpompusofe tompuyo fonjɨwo'nɨngkohofo'yoka pa'nyo upa'nɨmentohefoho. 3 Ahwomomo uhwononji uhwonɨmentoheso Anɨtuye epohumayo sopo yo'mayo songo humalofo osofosofahu'nohino sohwanji hwe engo sohwanji oso hwa humohumantohofo hopo sopo a'amuwan hantɨlet fouti-foua tausenɨso (144,000) nolohofontɨfi ta songo lɨmentohofofoho. Oso a'amu hwahoponta'angoso hofɨkoe wonyoso Jisas kako wae yao'mentisofoho. Oso'no a'amu hiso hofɨko'nohini oso ta songo somo huno'njofoho. Nom'ne a'amuso huno muyofoho. 4 Oso a'amu hiso hofɨko Anɨtumne'no sɨmeho anga'no uyontɨfi hwasyo anɨtu sohumo tɨfi minɨngkayo'njofoho. Nakwoe Wonyo'ne Poyo Pe'nɨmentiso sohwo kako hano ntonte wamo loso u oso a'amu hiso hofɨko tɨfi unɨngkowantɨfeho. Olo a'amu loso a'amu nom'ne somta'ni Anɨtu kako'ne'nji kakoe hwomumne'nji sɨmo'mo ma'mentisofoho. 5 Hofɨko hwasyo hungkuno majofoho. Honɨngkano wonyoso nɨhu'no anefoho.

A'amu ahwomomjo hufa'u sɨhune sohwa hungkuno lɨmentohofofoho.

6 Ngko nohumanji ole uhwonɨmentoho, A'amu ahwomomjo sohwo kako Anɨtuye hungkuno songo ne'no humayo'ne a'amu hwahopo humalofo somo lutɨhwayo'ne yohohisyomoyonto. A'amu hwaho kengo kengoso a'apaho kengo kengoso hungkuno kengo kengoso temtitofo kengo kengo osomne'no yohohisyomoyonto ulɨmentisofoho. 7 Kako mampaho engo'nji ole ulɨmento, Anɨtu kako a'amufe hungkuno ikwolofo'ne sɨkuno nto i'mofapohoho. Oso'no sekwo iyoho ikuji kakoe yofe foho'nomapmno. Oso hwe hwaho'nji ahwomo'nji mijo ayo'nji yo'mayo so'nji mtɨ'mokumentiso sohumo sɨmeho uyɨkuji hwomtame fehumamno.

8 Ose ulahonɨngki a'amu ahwomomjo nom'ne sohwo sɨmo'mjo sohumo inɨngkaponto ulɨmento, Pone engo Mpapiloun wonyo nto imo'nɨmaho. Pone engo hiso nto pɨwahu'maho. Oso hopo soponjo a'amuso hofɨko honɨngkano wonyo mɨkunɨmposo iwo'nɨngkohofoso hofɨko a'amu kengo kengoponta'ango somo honɨngkano wonyo homo somo kompemotapmmentohofofoho. Oso'no olohonta Anɨtuye sɨmeho tohinoso hofɨkimo nɨhu'nahone wonyo umokumasofoho.

9 Ose ulahonɨngki a'amu ahwomomjo nom'ne sohwo ahwomomjo sɨmo'njo sohwa'umo inɨngkaponto mampaho engo'nji ole ulɨmento, A'amuso hofɨko oso a'amu siki sɨwojo pa'nyo sohumo u kakoe huyo'mango sohumne'no hwomtame ehumafijoso hofɨkoe yomohu'nyopo ahopo sɨwojo sohwoe mtɨ'mokinyo hi'njo'manji 10 oso a'amumne'no Anɨtu kako sɨmeho tango mɨkunɨmposo uyɨhwosi tohino engo uyɨmontonoho. Toho engo akino wonyo'njo somo uhumajoso sopo nohumafɨkuji tohino engo ne'no umnonefoho. Osopo nohumentanɨngkuji a'amu ahwomomjo sohwanji a'amu hofɨkoe wonyomne'no poyo pe'nɨmentiso sohwo'nji a'amu hofɨkimo uhwonɨfitnnefoho. 11 Oso toho somta'ni tɨkayo ne'no nosyontanɨngkuhwosi hofɨko tohino mafɨkujoso hofɨko usijo'no mohumafitnnefoho. O'o a'amu oso sikisɨwojo pa'nyo sohumo u kakoe huyo'mango somne'no hwomtame ulohofontɨfi hofɨkoe a'apahopo kakoe ifalifaliyo mtɨ'mokumentohofoso hofɨkoe sɨkuno'nji imɨngo'nji hinjopo tohino ne'no umnonefoho. Ose ulɨmentisofoho.

12 I a'amu Anɨtuye hungkunomo tɨfi inɨngkawo'nɨngkohofo soku Jisasɨmo sɨmeho hi'ntnnono uyɨwo'nɨngkohofo soku sekwo olo hungkuno hiloso upa'nɨfijo'manji yo'mayo tango ko se'masoso sekwo Anɨtumne'no yokumpohn'nyo lohopitnnefoho.

13 Ngko nohumanji ahwomo mta'ni mampaho ole upa'nɨmentoho, Kɨko nje hungkunomo ifalifaliyo ole mtɨ'mojo, Yo'mayo uhwonalokuso somo moi'wo imo'nɨngkuhwosi oso hohosohonta a'amu Anɨtuye syoho ikuji pe'nɨfijoso sɨmeho wopɨngo umo'nɨmontonoho. Ose ntahonɨngki Anɨtuye Towahuno Wopɨngo ulɨmento, Ou, nehopeho. A'amu hiso hofɨkoe syoho engo noho'naofɨkuji usijo'no wohumantɨfeho. Hwapɨngoso a'amu Anɨtuye syoho'njo sohwo kako Anɨtuye hungkuno ne'no lutɨhwahonɨngki a'amuso hungkuno homo somo sɨmeho hi'ntnnono uyontɨfi inɨngkamentohofo sohwa hofɨko kako'nji ahwomomo sɨfetnnefoho. Oso'no kakoe syohomjo neso kako'nji ne'no wentɨhwonefoho.

Hwahoponjo wosopayo mojo mayo'ne sɨkunofoho.

14 Ngko nohumanji uhwonɨmentoheso, U himo halojo nowentanɨngki i hwe fihwo kako A'amufe Hwomu Pa'nyo sohwo nohumanto kako hwakuhwajo sɨhumampo'nnyoso kakoe ahomo nomokosyohumentanɨngki uhwononji uhwonɨmentoheso kakoe mnokinopo mnokino manji'mofo na'nohinoso kakoe mnokinopo monjɨmo'nosyohumentanɨngki uhwonɨmentohefoho. 15 A'amu ahwomo mta'ango nom'ne sohwo kako Anɨtuye ahwomomjo tajo ango engo somta'ni noswaponto a'amu himopo humentanjo sohumo kako mampaho engo ulɨmento, Sɨkuno moi'wo nto imo'nɨmaho. Hwaho ponjo wosopayoso toyo nto imaho. Jɨje hwakuhwajo sɨhumampo'nyo so'nji filohm'memaho. 16 Ose ulahonɨngki hwe himopo humamentiso sohwo kako kakoe hwakuhwajo hwahopo yoho'mo ulohofonto oso wosopayo ne somo lohm'mema'mentisofoho. Oso hiso nuhwononji ngko lɨmentoho, U oloso wosopayo'no molalofiyoho. O'o, a'amumne'no lalofoho. Ose syafɨhu'mentohefoho.

17 Ose uhwononji uhwonɨmentoheso a'amu ahwomomjo nom'ne sohwo kako Anɨtuye ango somta'ni kakoe hwakuhwajo'nji swomotolɨkofapmmentisofoho. 18 Osopo a'amu ahwomomjo nom'ne sohwo a'amu hofɨko yo'mayo Anɨtumne'no ho'nasyɨwo'nɨngkohofo ijempoho sopo nta'ni swapmmentisofoho. Oso a'amu huhwo sohwo kako a'amu yo'mayoso Anɨtumne'no toho uyofɨwo'nɨngkohofo somo mokosyohumawo'nɨngkiso hweho. Kako a'amu ahwomomjo hwakuhwajo swomotolɨkofapmmentiso sohumo mampaho mohm'no ole ulɨmento, Jɨje hwakuhwajo sɨhumampo'nyoso nomahoji nantɨpewain somjo mojo ehumasoso filoku'memaho. 19 Ose ulahonɨngki oso a'amu ahwomomjo sohwo kakoe hwakuhwajo'nji nantɨpewain somjo ipisayo mojo ehumunyoso loku'memayo hopaso kako a'amu Anɨtumne'no sɨmeho muyo'njo somo ahwonte mijo ilɨ'moku'mofo'ne somo hu'mɨ'mo'mentisofoho. Oso hopo sopo Anɨtuye mango sohwa hofɨko Anɨtu mta'ango tohino engo ma'mentohofofoho. 20 Oso ahwonte ipisayo mjɨ'mo'nyoso pone engo somo mempo sohohnta'ni ilɨ'mokumentohofoso oso ahwonte somta'ni honɨyo swofijwaoponto mijo hopa wamentisoso kakoe sawemosotɨli hantɨlet (300)kiloumitafoho. Oso honɨyo huhwo sohwo kako a'amufe swokinopo siyapmmentisofoho.